ဖယ်ခုံ၊ ပင်လောင်းတွင် စစ်ကောင်စီနှင့် PNOလမ်းပိတ်၊ ပြောင်းကုန်ရောင်းရန် ခက်ခဲ – သျှမ်းသံတော်ဆင့်

သျှမ်း-ကရင်နီပြည်နယ်စပ် သျှမ်းပြည်တောင်ပိုင်း ဖယ်ခုံမြို့၊ ပင်လောင်းမြို့နယ်တွင် စစ်ကောင်စီနှင့် ပအိုဝ်းပြည်သူ့စစ် (PNO) ပူပေါင်းတပ်ဖွဲ့က လမ်းများပိတ်ပင်ထားသည့်အတွက် ဒေသခံများ စပါးရိတ်သိမ်းရန်နှင့် ပြောင်းကုန်ရောင်းရန် ခက်ခဲလာနေသည်ဟု စုံစမ်းသိရသည်။

ပင်လောင်းမြို့နယ် ဗန်းမောက်ကျေးရွာတွင် တိုက်ပွဲများကြောင့် ပြည်သူ ထွက်ပြေးတိမ်းရှောင်နေချိန် စစ်ကောင်စီ နှင့် PNO ပူပေါင်းတပ်ဖွဲ့က ဒေသခံများ၏ ချွေးနဲစာဖြင့် စိုက်ပျိုးထားသည့် စပါးခင်းများကို ရိတ်သိမ်းယူဆောင်သွားနေသည်ဟု စစ်ရှောင်အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဒီပင်လောင်းတိုက်ပွဲကြောင့် ထွက်ပြေးတိမ်းရှောင်နေရတဲ့ ရွာတွေအများကြီးပဲ စပါးတွေစိုက်ပြီး ပြန်ရိတ်သိမ်းဖို့ ခက်ခဲနေတဲ့ကာလကို စစ်တပ်နဲ့ ပအိုဝ်းပြည်သူ့စစ်တွေက အခွင့်ကောင်းယူပြီး ရှိသမျှစပါးခြံတွေကို ရိတ်သိမ်းသွားကြတယ်။ ကျမတို့ ပြန်လာရမှာတောင် ကြောက်နေတယ်”ဟု ၎င်းက ပြောသည်။

ထို့ပြင် ကရင်နီပြည်အတွင်း တိုက်ပွဲကြောင့် ဖယ်ခုံမြို့နယ်သို့ စစ်ရှောင်လာသည့် ပြည်သူများသည် တပိုင်တနိုင် ပြောင်းဖူးကို စိုက်ပျိုးအားထားရာသည်။ လက်ရှိမှာလည်း ထိုပြောင်းဖူးများရောင်းရန်အတွက် စစ်ကောင်စီက လမ်းကြောင်းပိတ်လိုက်သဖြင့် ဂိုဒေါင်ထဲတွင်သာ သိုလှောင်ထားနေရသည်ဟု ဒေသခံအမျိုးသားတစ်ဦးက ပြောသည်။

“အခုက စစ်တပ်တွေက လမ်းမကြီးဘက်မှာ စောင့်ပြီး ဂိတ်တွေပိတ်တယ်။ ဘယ်သူ့ကိုမှ ပေးမဖြတ်ဘူး။ ပြောင်းဖူးခြံတွေလည်း သွားလို့မရဘူး။ ပြောင်းဖူးတွေဆို ဂိုဒေါင်ထဲမှာ လှောင်ထားတာ မှိုတွေတောင်တက်နေပြီ၊ အခု စားသောက်ဖို့ ရှာဖွေနေရတာလည်း တကယ်မလွယ်ဘူး”ဟု ၎င်းက ပြောသည်။

လက်ရှိအခြေအနေတွင် စစ်ကောင်စီနှင့် PNO တပ်ဖွဲ့တို့သည် ရိက္ခာ တင်ပို့သည့်လမ်းကြောင်းကို ပိတ်ဆိုင်း လိုက်ရုံသာမက စစ်ရှောင်များတပိုင်တနိုင် လုပ်စားနေရန် သွားလာသည့် လမ်းကြောင်းများကို ပါ ပိတ်လိုက်သဖြင့် နောင်လာမည့် နှစ်အတွက် စားဝတ်နေရေး ပိုခက်ခဲကြောင်း လည်း ဖယ်ခုံ ပြည်သူများက ပြောဆိုလိုက်သည်။

ပြီးခဲ့သည့် နိုဝင်ဘာလ (၈)ရက်တွင်လည်း ဖယ်ခုံမြို့နယ် ကာလကျေးရွာကို စစ်ကောင်စီတပ်မှ တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကြဲတိုက်ခိုက်မှုကြောင့် စစ်ရှောင်နှစ်ဦးသေဆုံးခဲ့ပြီး တစ်ဦး ဒဏ်ရာ အပြင်းအထန် ရရှိခဲ့ကာ နေအိမ် ၆ လုံးခန့် ပျက်စီးသွားခဲ့သည်ဟု သိရသည်။

နိုဝင်ဘာလ ၁၁ ရက် ဖယ်ခုံမြို့နယ်၊ ပူချယ်ကျေးရွာမှ စပါးရိတ်ပြန်လာသော ဒေသခံပြည်သူ ၂၀၀ ကျော်ကို ပင်လောင်း-ဖယ်ခုံမြို့နယ်တွင် စစ်ကြောင်းထိုးနေသော စစ်ကောင်စီတပ်ဖွဲ့နှင့် ပြည်သူ့စစ် (PNO) ပူပေါင်းတပ်ဖွဲ့က ဖမ်းဆီးထားကြောင်း KNDF၏ ထုတ်ပြန်ချက်အရ သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။