Written by 
ဖိလစ်ပိုင်နိုင်ငံရှိ ဟိုတယ်တစ်ခုမှာ ကမ္ဘာ့အကြီးမားဆုံး ကြက်ဖပုံ အဆောက်အအုံအဖြစ် ဂင်းနက်စ် စံချိန်တင်သွားသည်။
တည်ရှိသည့်နေရာမှာ ဖိလစ်ပိုင်နိုင်ငံအလယ်ပိုင်း Negros Occidental ပြည်နယ်မှ Campuestohan Highland အပန်းဖြေစခန်းတွင် တည်ရှိသည်။
ကြက်ဖပုံ အဆောက်အအုံကြီးမှာ အမြင့် ၃၄ ဒသမ ၉၃၁ မီတာ (၁၁၅ ပေခန့်)၊ အကျယ် ၁၂ ဒသမ ၁၂၇ မီတာ (ပေ ၄၀ နီးပါး)၊ အလျား ၂၈ ဒသမ ၁၇၂ မီတာ (၉၂ ပေခန့်) ရှိကြောင်း ဂင်းနက်စ်ကမ္ဘာ့စံချိန်အဖွဲ့၏ ဝက်ဘ်ဆိုက်တွင် ဖော်ပြသည်။
ကြက်ဖပုံ ဟိုတယ်အဆောက်အအုံကြီးတွင် အခန်း ၁၅ ခန်းပါဝင်ပြီး လေအေးပေးစက်များ၊ ကြီးမားသော အိပ်ရာကြီးများ၊ ရုပ်မြင်သံကြားစက်များနှင့် ရေပန်းများပါဝင်သည်။ အထပ်တိုင်းမှာ ၂ ဒသမ ၆ မီတာအမြင့်ရှိပြီး ၁၃ ထပ်အဆောက်အအုံတစ်လုံး၏ အမြင့်ခန့်ရှိသည်။
ကြက်ဖပုံဟိုတယ်ကို ဆောက်လုပ်ရန် စီစဉ်ခဲ့သူ ရီကာဒို ကာနို ဂွါပို တန်က ပြောသည်မှာ ၎င်းသည် အိပ်မက်ကြီးကြီးမက်လေ့ရှိသူဖြစ်ပြီး အများမထင်ထားသည့်အရာတစ်ခု ဖန်တီးလိုစိတ်ရှိခဲ့ကြောင်း ပြောသည်။
“ပြည်သူတွေ တကယ်သဘောကျသွားမယ့်၊ ဟာခနဲ ဟင်ခနဲဖြစ်သွားစေမယ့်အရာမျိုးလုပ်ဖို့ ကျွန်တော်ရည်မှန်းခဲ့ပါတယ်”
(ရီကာဒိုက သူ၏အိပ်မက်ကို လျင်မြန်စွာ အကောင်အထည်ဖော်ခဲ့ရာ နမူနာပုံဖော်ခြင်းနှင့် စီမံကိန်းချခြင်း တို့အတွက် ၆ လသာကြာမြင့်ခဲ့သည်။ ဓာတ်ပုံ-Guinness World Record)
၂၀၂၃ ခုနှစ်၊ ဇွန်လ ၁၀ ရက်တွင် စတင်ဆောက်လုပ်ခဲ့ပြီး ၂၀၂၄ ခုနှစ်၊ စက်တင်ဘာလ ၈ ရက်တွင် ဂင်းနက်စ်ကမ္ဘာ့စံချိန်မှတ်တမ်းတင်ခံခဲ့ရသည်။
အခန်း ၁၅ ခန်းပါဟိုတယ်ဖြစ်ပြီး မိသားစုဝင်များသူများ၊ အုပ်စုလိုက် ခရီးသွားသူများ သက်တောင့်သက်သာ အပန်းဖြေနိုင်သော နေရာဖြစ်သည်။
(ထူးခြားစွာ ပုံဖော်ဆောက်လုပ်သည့် အဆောက်အအုံဖြစ်ခြင်းကြောင့် စိန်ခေါ်မှုများကား ရှိနေသည်)
အဆောက်အအုံတည်ရှိသည့်ဒေသမှာ တိုင်ဖွန်းမုန်တိုင်းများ မကြာခဏတိုက်ခတ်သည့်ဒေသဖြစ်ရာ မုန်တိုင်းဒဏ်ကို ကြံ့ကြံ့ခံနိုင်ရန်မှာ စိန်ခေါ်မှုတစ်ခု ဖြစ်သည်။
ထိုသို့ စိန်ခေါ်မှုများရှိသော်လည်း ဆောက်လုပ်မှုကာလ ၄၅၆ ရက်သာ ကြာမြင့်ခဲ့သည်။
(ကြက်ဖဟိုတယ်ကြီး၏ မြင်ကွင်း)
အဘယ်ကြောင့် ကြက်ဖပုံဆောက်လုပ်ရန် ရွေးချယ်ခဲ့သနည်း။
ရီကာဒိုက ပြောသည်မှာ “Negros Occidental ပြည်နယ်မှာက တိုက်ကြက်လုပ်ငန်းတွင်ကျယ်ပါတယ်။ ဒီလောကဟာ ဖိလစ်ပိုင်မှာ လူသန်းပေါင်းများစွာကို အလုပ်အကိုင်တွေ ပေးထားတာ ဖြစ်ပါတယ်။ ကြက်ဖတစ်ကောင်ကို ကြည့်မယ်ဆိုရင် အေးဆေးတည်ငြိမ်မှု၊ အမိန့်ပေးကွပ်ကဲနိုင်မှု၊ ခန့်ညားမှု၊ ကြံ့ခိုင်မှု အစရှိတာတွေကို တွေ့ရမှာ ဖြစ်ပါတယ်။” ဟု ဆိုသည်။
ရီကာဒို၏ ဇနီးဖြစ်သူ နီတာက Campuestohan Highland အပန်းဖြေစခန်းမြေနေရာကို ဝယ်ယူခဲ့ပြီးနောက် ၂၀၁၀ ပြည့်နှစ်တွင် မြေကွက်နေရာရှင်းလင်းခြင်းများ ပြုလုပ်ခဲ့သည်။
ထိုနေရာရှိ တောင်တန်းအလှ၏ ညှို့ယူဖမ်းစားနိုင်မှုကို မိမိတို့ အံ့အားသင့်ခဲ့ကြရကြောင်း ရီကာဒိုက ပြောသည်။
ထိုနေရာတွင် လမ်းကြမ်းကာ လျှပ်စစ်မီးမရှိသော်လည်း ရီကာဒိုက အပန်းဖြေစခန်းတစ်ခု စတင်ဆောက်လုပ်ခဲ့သည်။
ယနေ့အခါတွင်ကား ရီကာဒို၏ အပန်းဖြေစခန်းတွင် လှိုင်းလုံးထုတ်စက်များ တပ်ဆင်ထားသော ကြီးမားသည့် ရေကူးကန်ကြီးတစ်ခု၊ စားသောက်ဆိုင်ကြီးတစ်ခု၊ ကော်ဖီဆိုင်၊ ရေကူးကန် ၃ ခု၊ ဟိုတယ်ခန်းများ၊ သေသပ်လှပသော တဲကလေးများ၊ ရာနှင့်ချီသော ဒိုင်နိုဆော-ကာတွန်းရုပ်များ၊ ကမ္ဘာ့အကြီးမားဆုံး ကြက်ဖပုံ အဆောက်အအုံကြီးတို့ ရှိနေပြီဖြစ်သည်။
ကမ္ဘာ့အကြီးမားဆုံးကြက်ဖပုံအဆောက်အအုံကြီးမှာ ထိုဒေသ၏ ပြယုဂ်တစ်ခုဖြစ်လာနေပြီး ဒေသခံတို့ ဂုဏ်ယူစရာတစ်ခု ဖြစ်လာသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Philippine hotel named biggest chicken-shaped building in the world in Guinness records (gwr, straitstimes, indianexpress,vnexpress)
Photo Credit-Guinness World Record