Written by 
ဟိန္ဒူကျေးရွာတစ်ရွာကို ဇာတ်အိမ်တည်ရိုက်ကူးထားသည့် ရုပ်ရှင်ဇာတ်ကား အမည်နှင့်ပိုစတာသည် အိန္ဒိယနွယ်ဖွားများကို ချိုးနှိမ်ရာရောက်ကြောင်း ဝေဖန်သည့် ရန်ကုန်မြို့ခံ အမျိုးသားကို စစ်ကောင်စီက နိုင်ငံမတည်ငြိမ်အောင်လှုံ့ဆော်မှုစွဲချက်ဖြင့် ဖမ်းဆီးထားသည်။
ရန်ကုန်၊ လှိုင်မြို့နယ်နေ အသက် ၃၀ ကျော်အရွယ် ဟိန္ဒူအမျိုးသား ဦးရှိုင်းထက်အောင် ခေါ် ဗွီးထက်ကူးမားသည် “ဂျစ်ကားစီးဖူးသလား ဂျားကစ်စာဘူးသရီး” ဟု အမည်ပေးထားသည့် ရုပ်ရှင်ကားကို Facebook တွင် ဝေဖန် ရေးသားခဲ့ခြင်းဖြစ်သည်။
အာဏာသိမ်းထားသည့် ၄ နှစ်အတွင်း ဝေဖန်သူအများအပြားကို ဖမ်းဆီးထားသော်လည်း ဦးရှိုင်းထက်အောင်သည် ရုပ်ရှင်ဇာတ်ကားကို ဝေဖန်မှုဖြင့် ဖမ်းဆီးခံရသည့် ပထမဆုံးပုဂ္ဂိုလ်ဖြစ်သည်။
အောက်တိုဘာ ၂၇ တွင် စာအုပ်ဖတ် အသံသွင်းရန် မရမ်းကုန်းမြို့နယ် ခဝဲခြံမျက်မမြင်ကျောင်းတွင် သွားရာမှ မိသားစုနှင့်အဆက်အသွယ်ပြတ်သွားသည်။
စစ်ကောင်စီက အောက်တိုဘာ ၃၀ ရက်စွဲဖြင့် သတင်းထုတ်ပြန်ရာတွင် သူ့ကို လှိုင်မြို့နယ်ရဲစခန်းတွင် ဖမ်းဆီးအမှုဖွင့်ထားကြောင်း ဖော်ပြထားသည်။
ဦးရှိုင်းထက်အောင်ကို စစ်ကောင်စီတပ်သားတို့က ခေါ်ဆောင်သွားသည်ဟု ပြောဆိုကြသဖြင့် နီးစပ်ရာရဲစခန်းကို အကြောင်းကြားကာ မိသားစုက လိုက်လံရှာဖွေခဲ့ကြသော်လည်း မတွေ့ဘဲ သတင်းစာတွင် ထုတ်ပြန်မှသာ အခြေအနေကို သိရကြောင်း ဦးရှိုင်းထက်အောင်၏ မိတ်ဆွေတစ်ဦးက Myanmar Now ကို ပြောသည်။
“မိသားစုနဲ့ တွေ့ခွင့်တော့ရပြီ။ အခြေအနေကောင်းမယ်လို့တော့ပြောတယ်။ ဘယ်ပုဒ်မတွေတပ်ထားလဲ မသိရသေးဘူး။ သူက ရုပ်ရှင်ကို ဝေဖန်လိုက်တဲ့အချိန်မှာ Share (မျှဝေ) တဲ့လူလည်း များသွားပြီးတော့မှ မလိုတဲ့သူတွေက ဖြတ်ညှပ်ကပ်လုပ်ပြီး ပြန်ဖွတယ်နေမှာပေါ့။ အဲ့ဒါကို အမှုဖွင့်ပြီးခေါ်သွားတယ်” ဟု လုံခြုံရေးအရ အမည်မဖော်လိုသူ ထိုအမျိုးသားက ပြောသည်။
ဦးရှိုင်းထက်အောင်သည် ပရဟိတစိတ်ရှိသဖြင့် လူမှုကူညီရေးလုပ်ငန်းများကို ထဲထဲဝင်ဝင်ကူညီသူ ဖြစ်သည်ဟုလည်း သိရသည်။
နိုဝင်ဘာ ၁ ရက်နေ့တွင် ကျရောက်မည့် ဟိန္ဒူဘာသာဝင်တို့၏ မီးထွန်းပွဲတော် ဒေပါဝါလီပွဲတော်ကာလတွင် ရုံတင်ပြသမည့် ထိုရုပ်ရှင်ကား အမည်နှင့် ပိုစတာပုံပါ ဝတ်စားဆင်ယင်မှုများမှာ ခေတ်အဆက်ဆက် မျိုးနွယ်စုများကို ချိုးနှိမ်ဟာသလုပ်ထား၍ ကန့်ကွက်ကြောင်း ဦးရှိုင်းထက်အောင်က ရေးသားခဲ့သည်။
“အိန္ဒိယနွယ်ဖွားတွေကို မြင်ရင် ခနဲ့သော ချိုးနှိမ်လိုသော စိတ်ဖြင့်သုံးနှုန်းသော အသုံးနှုံးတစ်ရပ်အား နိုင်ငံတစ်ဝှမ်းလုံးလူသိရှင်ကြားဖြင့် ကြေညာသလိုမျိုးဖြစ်နေတယ်။ ဒါက သိပ်မကြာခင်ပွဲတော်ရက်မှာ တစ်ခုခုဖြစ်စေချင်လို့ အချိန်ကိုက်ပြီးများ လုပ်တာလားလို့တောင် သံသယဖြစ်မိပါတယ်။ ကျွန်တော်တို့ ဘယ်သူမှပျော်မနေကြပါ။ ပျော်ပွဲရွှင်ပွဲဆိုတာထက် မီးထွန်းပွဲတော်ပါ” ဟု သူက ရေးသားထားသည်။
“ဆီးမီးပူဇော်ပြီး အဘက်ဘက်က ပြည်သူတွေရဲ့ ဆင်းရဲဒုက္ခတွေကို ပြေပျောက်ဖို့ ဆုတောင်းမေတ္တာပို့ရမယ့် အချိန်မှာ အခုလို အကျည်းတန်လွန်းတဲ့ပုံစံနဲ့ ထွက်လာတာကို မည်သို့မျှလက်မခံနိုင်ပါ”
သူ၏ရေးသားမှုကို လူမှုကွန်ရက်တွင် ပြန်လည်မျှဝေသူ ၆,၂၀၀ ခန့် ရှိသည်။
ထိုရုပ်ရှင်သည် ဟိန္ဒူဘာသာဝင်တို့၏ ရိုးရာဓလေ့နှင့် ယဉ်ကျေးမှုအသုံးဆောင်များကို စော်ကားထားပြီး ရိုးရာဝတ်စုံတို့ကို အပျော်အပျက် သရုပ်ဖော်လှောင်ပြောင်ထား၍ ကန့်ကွက်ကြောင်း မြန်မာဟိန္ဒူသမဂ္ဂက အောက်တိုဘာ ၂၉ တွင် သဘောထားထုတ်ပြန်ထားသည်။
အဆိုပါရုပ်ရှင်ကို ကိုဇော်(အရုဏ်ဦး) က ရိုက်ကူးပြီး လွင်မိုး၊ ခန့်စည်သူ၊ ခိုင်သင်းကြည်၊ ရွှေမှုန်ရတီနှင့် အခြားသရုပ်ဆောင်များ ပါဝင်သရုပ်ဆောင်ထားသည်။
ရုပ်ရှင်အမည်နှင့် ပိုစတာပုံကို ဝေဖန်ကန့်ကွက်မှုများရှိလာ၍ ရုပ်ရှင်အမည်ကို “ဂျစ်ကားစီးဖူးသလား”ဟု ပြန်လည်ပြောင်းလဲထားကြောင်း ကိုဇော်(အရုဏ်ဦး)က သတင်းဌာနတချို့ကို ပြောဆိုထားသည်။
မြန်မာဒါရိုက်တာတချို့ရိုက်ကူးသည့် ရုပ်ရှင်ကားများသည် တိုင်းရင်းသားလူမျိုးများ၏ ဝတ်စားဆင်ယင်မှု၊ ဘာသာစကား၊ ယဉ်ကျေးမှု၊ ကိုးကွယ်ယုံကြည်မှုတို့ကို လှောင်ပြောင်သည့် ဇာတ်လမ်းဇာတ်ကွက်များ ပါဝင်လေ့ရှိသည်။
အလားတူ မသန်စွမ်းများ၊ နွမ်းပါးသူများ၊ လိင်စိတ်ခံယူမှုကွဲပြားသူများနှင့် ပတ်သက်သည့် ရိုက်ကွက်များသည်လည်း လှောင်ပြောင်သည့် သရုပ်ဆောင်ချက်များပါဝင်ရာ မကြာခဏ ဝေဖန်ခံရလေ့ရှိသည်။
၂၀၂၂ ဖေဖော်ဝါရီမှ ယခုနှစ် ဇူလိုင်လကုန်အထိ လူမှုကွန်ရက်တွင် တော်လှန်ရေးအပေါ် ထောက်ခံရေးသားမှု၊ စစ်ကောင်စီကို ဝေဖန်ရေးသားမှုများနှင်ပတ်သက်၍ အွန်လိုင်းအသုံးပြုသူ ၁,၇၀၀ နီးပါးဖမ်းဆီးခံထားရကြောင်း Data for Myanmar အဖွဲ့က ပြုစုထားသည့် စာရင်းများတွင် တွေ့ရသည်။
လူမှုကွန်ရက်တွင် လှုံ့ဆော်၊ ဝါဒဖြန့်၊ ခြိမ်းခြောက်သူများကို အကြမ်းဖက်မှုတိုက်ဖျက်ရေးပုဒ်မ ၅၂(က)၊ ရာဇသတ်ကြီးပုဒ်မ ၁၂၄-က၊ ပုဒ်မ ၅၀၅-က၊ အီလက်ထရောနစ် ဆက်သွယ်ရေးဥပဒေပုဒ်မ ၃၃(က) နှင့် တည်ဆဲဥပဒေတို့ဖြင့် အရေးယူမည်ဟု ၂၀၂၂ နှစ်ဆန်းတွင် စစ်ကောင်စီက ထုတ်ပြန်ခဲ့သည်။