Written by 
Eminem ၏ သီချင်းများနှင့် မြန်မာပရိသတ် များစွာရင်းနှီးသည်။
Eminem ၏ Shake That အမည်ရှိသီချင်းကို စိုင်းစိုင်းခမ်းလှိုင်က တောဂေါ်လီဟု ပြန်လည်သီဆိုခဲ့ဖူးသည်။ ထို့အပြင် Eminem ၏ Rabbit run ကို စိုင်းစိုင်းခမ်းလှိုင်ကပင် ကြေညာရန်မလိုဟု ပြန်လည်သီဆိုထား သေးသည်။
Eminem ကိုယ်တိုင် ပါဝင်သရုပ်ဆောင်ထားပြီး အမေရိကန်ရုပ်ရှင်မင်းသမီး Brittany Murphy လည်း ပါဝင်သော 8 Mile အမည်ရှိ ရုပ်ရှင်ဇာတ်ကား ရုံတင်ခဲ့ဖူးသည်။
8 Mile ဟူသော ရွေ့လျားအိမ်စခန်းတွင် Eminem ကြီးပြင်းခဲ့ပုံကို ရိုက်ကူးပြသထားခြင်းဖြစ်သည်။
ရိုက်ကူးစရိတ် ဒေါ်လာ ၄၁ သန်းကုန်ကျပြီး ရုံတင်ပြသရာတွင် ဒေါ်လာ ၂၄၂ ဒသမ ၉ သန်းရခဲ့ရာ စီးပွားရေးအရ အောင်မြင်ခဲ့သည့် ဇာတ်ကားဖြစ်သည်။
ရုပ်ရှင်ထဲတွင် ထိုသို့ရိုက်ကူးပြသခဲ့သော်လည်း Eminem သည် Continental Mobile Village တွင် အမှန်တကယ် နေထိုင်ခဲ့ဖူးခြင်း မရှိချေ။
Eminem နေခဲ့ဖူးသည်မှာ အခြား trailer park တစ်ခုတွင်ဖြစ်သည်။
အဓိကအားဖြင့် ငယ်ဘဝဖြတ်သန်းခဲ့သည်မှာ မီချီဂန်ပြည်နယ်၊ ဒက်ထရွိုက်မြို့၊ Greensbriar အရပ်၊ Dresden လမ်း၊ အမှတ် ၁၉၉၄၆ ရှိ နေအိမ်တွင် ဖြစ်သည်။
8 Mile ရုပ်ရှင်ထဲတွင် ရိုက်ကူးပြသထားသည်မှာ Eminem အမှန်တကယ်နေထိုင်ခဲ့ဖူးသည့်နေရာကို ပြသခြင်းမျိုး မဟုတ်ဘဲ ငယ်ဘဝက နေထိုင်ခဲ့ရပုံကို ရည်ညွှန်းပုံဖော်ပြသသည့်သဘောသာဖြစ်သော်လည်း သူ၏ ကမ္ဘာအရပ်ရပ်မှ ပရိသတ်များမှာ မီချီဂန်ပြည်နယ်ရှိ 8 Mile trailer park သို့ ဘုရားဖူးထွက်သည့်သဖွယ် အလုံးအရင်း လာရောက်ကြည့်ရှုမှုများ ရှိနေသည်။
ရုပ်ရှင်ထဲတွင် ပြသထားသည့် trailer အိမ်မှာလည်း Eminem ငယ်စဉ်က နေထိုင်ခဲ့သည့်အိမ်မဟုတ်ဘဲ ရုပ်ရှင်ရိုက်ကူးရေးအဖွဲ့က ယူဆောင်လာသည့်အိမ်သာ ဖြစ်သည်။
Eminem အမှန်တကယ်နေထိုင်ခဲ့သော ငယ်ဘဝအိမ်မှာ ဒက်ထရွိက်မြို့၊ dresden လမ်းတွင် တည်ရှိသည့်နေအိမ်ဖြစ်ပြီး Eminem ၏ The Marshall Mathers LP2 တေးအယ်လ်ဘမ် Cover တွင် ဖော်ပြခဲ့ဖူးသည်။
(ဓာတ်ပုံ-Pop-music.ca)
၂၀၁၇ ခုနှစ်အတွင်း Eminem ၏ ပရိသတ်တစ်ဦးဖြစ်သူ Shelly Hazlett အမည်ရှိ အမျိုးသမီးတစ်ဦးက Eminem ၏ ကလေးဘဝနေအိမ်ကို ဝယ်ယူကာ Eminem အတွက်ပြတိုက်အဖြစ် ပြောင်းလဲသွားရန် ကြိုးစားနေစဉ် နေအိမ်မှာ မီးသင့်လောင်ခဲ့သည်။
Shelly ၏ ဝယ်ယူရန်ကမ်းလှမ်းမှုကို နေအိမ်ပိုင်ဆိုင်ထားသော Michigan Land Bank က လက်ခံခဲ့ခြင်း မရှိချေ။
ဘန်ဂလိုဟန်ဆောက်လုပ်ထားသော နေအိမ်ဖြစ်ပြီး နေအိမ်တည်ရှိရာလမ်းတွင် လူမနေသောအိမ်ပေါင်း အလုံး ၇၀ ကျော်ရှိနေရာ Eminem ၏ နေအိမ်လည်း တစ်လုံးအပါအဝင်ဖြစ်ခဲ့သည်။
၂၀၁၃ ခုနှစ်၊ နိုဝင်ဘာလ ၁၀ ရက်တွင် မီးသင့်ခဲ့ပြီးနောက် နေအိမ်၏ structure မှာ ဘေးအန္တရာယ်ရှိသောကြောင့် နိုဝင်ဘာလလယ်ပိုင်းတွင် မီချီဂန်ပြည်နယ်အုပ်ချုပ်ရေးအဖွဲ့က နေအိမ်ကို ဖြိုချခဲ့ကာ မြေနေရာကို လေလံတင်ရောင်းချခဲ့သည်။
(Eminem ၏ နေအိမ်ကို ပြည်နယ်အုပ်ချုပ်ရေးအဖွဲ့က ဖြိုချခဲ့ပုံ။ ဓာတ်ပုံ-mlive)
လေလံတင်ရာတွင် Eminem ၏ ကလေးဘဝနေထိုင်ခဲ့သောနေရာဖြစ်ကြောင်း သတင်းများ ပျံ့နှံ့ခဲ့သောကြောင့် လေလံဆွဲမှုအကြိမ်ရေ ၁၂၀ ကျော်ရှိခဲ့သည်။
ပြည်နယ်အုပ်ချုပ်ရေးအဖွဲ့က Eminem ထံ ဆက်သွယ်ခဲ့သေးပြီး လေလံဆွဲရန် စိတ်ဝင်စားခြင်း ရှိ၊ မရှိ မေးမြန်းခဲ့ရာ Eminem က ဝယ်ယူရန် စိတ်မဝင်စားခဲ့ချေ။
နေအိမ်မီးလောင်သွားသောကြောင့် စိတ်မချမ်းသာဖြစ်ရကြောင်း Eminem က ပြောခဲ့သည်။
((ပျားမွေးမြူရေးစခန်းဖြစ်လာ))
Detroit Hives ကို တည်ထောင်ထားသော Timothy Paule Jackson နှင့် Nicole Lindsey တို့စုံတွဲက ဒက်ထရွိုက်ရှိ မြေကွက်လွတ် ၃ ခုကို ဝယ်ယူကာ ပျားမွေးမြူရေးစခန်းအဖြစ် ပြောင်းလဲရန် ၂၀၁၇ ခုနှစ်တွင် ခြေလှမ်းစတင်ခဲ့သည်။
Detroit Hives သည် အကျိုးအမြတ်အတွက်မဟုတ်သောအဖွဲ့တစ်ခုဖြစ်သည်။
ဒက်ထရွိုက်မြို့၊ Osborn အရပ်ရှိ မြေကွက် ၃ ခုကို Detroit Black Farmerland Fund ၏ အကူအညီရယူကာ ဒေါ်လာ ၃၀၀၀ မျှဖြင့် ဝယ်ယူခဲ့ခြင်း ဖြစ်သည်။
အဆိုပါမြေကွက် ၃ ခုတွင် Dresden လမ်း၊ အမှတ် ၁၉၉၄၆ မြေကွက်လည်းပါဝင်ရာ တချိန်က Eminem ငယ်ဘဝနေထိုင်ခဲ့သော နေအိမ်တည်ရှိခဲ့သည့်နေရာဖြစ်သည်။
Ref: Eminem’s childhood home in Detroit demolished by State of Michigan; 19946 Dresden lot for sale (mlive, allabouteminem, huffpost)
Photo Credit-Popmusic, mlive