ထိုင်းမှာတားမြစ်ထားတဲ့ E-cigarettes လုပ်ငန်းခွင် စီးနင်းမှု မြန်မာအမျိုးသမီး ၂၀ကျော် အဖမ်းခံရ

ထိုင်းနိုင်ငံ ဘန်ကောက်မြို့အနီး ဘန်ဘောမြို့နယ်ထဲမှာ ထိုင်းနိုင်ငံက ကျန်းမာရေးအရ တားမြစ်ထားတဲ့ E-cigarettes အီးစီးကရက် ထုတ်လုပ်နေတဲ့လုပ်ငန်းခွင်တခုကို ထိုင်းအာဏာပိုင်တွေက ရှောင်တခင် ဝင်ရောက်စီးနင်းရာ မြန်မာအမျိုးသမီး ၂၀ကျော်ဖမ်းဆီးခံရပါတယ်။ ဖမ်းဆီးခံရတဲ့မြန်မာအမျိုးသမီး ၂၀ကျော်ထဲမှာ တဝက်လောက်က အလုပ်အကိုင်ခွင့်မရှိ အထောက်အထားမဲ့တွေဖြစ်တယ်လို့လည်း သိရပါတယ်။ ထိုင်းအခြေစိုက် ဗွီအိုအေသတင်းထောက်မအေးအေးမာက သတင်းပေးပို့ထားပါတယ်။

ထိုင်းနိုင်ငံ ဘန်ကောက်မြို့အနီး ဘန်ဘော မြို့နယ်ထဲမှာ ထိုင်းနိုင်ငံက ကျန်းမာရေးအရ တားမြစ်ထားတဲ့ E-cigarettes အီးစီးကရက်ထုတ်လုပ်နေတဲ့ လုပ်ငန်းခွင်တခုကို ဝင်ရောက်စီးနင်းရာ မြန်မာအမျိုးသမီးအလုပ်သမား ၂၀ကျော် ဖမ်းဆီးခံခဲ့ရပါတယ်။ ထိုင်းနိုင်ငံက ၂၀၁၄ခုနှစ်ကစပြီး တားမြစ်ထားတဲ့ အီးစီးကရက်တွေကို ထုတ်လုပ်နေတာကို သတင်းရတာကြောင့် ထိုင်းအာဏာပိုင်တွေက နိုဝင်ဘာလ ၁၈ရက်နေ့က ရှောင်တခင်ဖမ်းဆီးရင်း မြန်မာအမျိုးသမီးအလုပ်သမား ၂၀ကျော်ဖမ်းဆီးခံလိုက်ရတာဖြစ်တယ်လို့ အလုပ်သမားရေးလှုပ်ရှားသူ ဦးမိုးကြိုးက အခုလိုပြောပါတယ်။

“သူတို့က ဘန်ကောက်မြို့နယ်ထဲမှာရှိတဲ့ဘန်ဘောမြို့နယ်ထဲမှာ E-cigarettes အီးစီကရက်တွေ ထုတ်လုပ်နေတယ်လို့ သတင်းရရှိတဲ့အတွက် တာဝန်ရှိသူတွေက ရှောင်တခင်ဝင်ရောက်စစ်ဆေးတဲ့အခါမှာတရုတ်အလုပ်ရှင်နဲ့အတူ မြန်မာအမျိုးသမီးအလုပ်သမား၂၂ဦးကိုဖမ်းဆီးလိုက်ပါတယ်။ အီးစီးကရက်ကိုတော့ ထိုင်းနိုင်ငံက အန္တရယ်များတဲ့အလုပ်ဖြစ်တဲ့အတွက် အထူးတားမြစ်ထားတာပါ။ အဲဒါကြောင့်လုပ်ငန်းရှင်မှာကော သူခိုင်းစေတဲ့အလုပ်သမားတွေမှာပါ အပြစ်ရှိတာပေါ့နော် အဲဒီမှာက အရှေ့မှာ အလှကုန်ပစ္စည်းတွေကိုပြသထားပြီးတော့ နောက်မှာကတော့ ထိုင်းဥပဒေက တားမြစ်ထားတယ် e-cigarettesအီးစီကရက်တွေကို ထုတ်လုပ်နေတာဖြစ်တယ်၊ အီးစီးကရက်ပေါင်း ၃၅၀၀ကျော် ဆေးရည်၆၃ ဂါလံ ရယ် စက်ပစ္စည်းအမျိုးအစား ၈လုံးရယ် တခြားကရိယာပေါင်းကေ ၃သောင်း ၃ထောင်ကျော်ကို လက်ဝယ်တွေ့ရတာကြောင့်ဖမ်းဆီးပါတယ်။”

ဖမ်းဆီးခံရတဲ့ မြန်မာအမျိုးသမီး ၂၀ကျော်ထဲမှာ တဝက်လောက်ကတော့ အထောက်အထား လက်မှတ်တွေရှိပေမယ့် လုပ်ငန်းခွင်မတူတာ အလုပ်ရှင်မတူတာတွေဖြစ်နေသလို့ တခြားအလုပ်သမားတွေကတော့ အထောက်အထားမဲ့တွေဖြစ်တယ်လို့လည်းပြောပါတယ်။

“မြန်မာအမျိုးသမီး အလုပ်သမား ၂၂ဦးကို စစ်ဆေးတော့ ၁၁ဦးကတော့ အလုပ်သမားစာရွက်စာတမ်း အပြည့်အစုံရှိတယ်။ ဒါပေမယ့် အလုပ်ရှင်မတူတာတွေဖြစ်နေတယ် တခြားအမျိုးသမီး ၁၁ဦးကတော့ ဘာမှ အထောက်အထားမရှိဘူး။ ဒီအတွက် ထိုင်းနိုင်ငံထဲကို တရားမဝင်ဝင်ရောက်မူ့တွေနဲ့ ခွင့်ပြုချက်မရှိတဲ့ အလုပ်ကိုလုပ်တာတွေနဲ့တရားစွဲဆို ဖမ်းဆီးခံရမှာဖြစ်ပါတယ်။”

ထိုင်းနိုင်ငံမှာ E-cigarettes အီးစီကရက်ပိတ်ပင်မူ့ကို ၂၀၁၄ကနေ စတင်ခဲ့ပြီး ထိုင်းနိုင်ငံသားတွေသာမက ထိုင်းကိုလာရောက်လည်ပတ်တဲ့နိုင်ငံခြားသားတွေပါ သောက်သုံးခွင့်မရှိဘူးဆိုပြီး တားမြစ်ထားပါတယ်။ E-cigarettes အီးစီးကရက်တွေဟာ လူငယ်တွေကို ဆေးလိပ်သောက်ဖို့ ဆွဲဆောင်နေတယ်ဆိုပြီး ကျန်းမာရေးအကြောင်းပြချက်နဲ့တားမြစ်ထားတာပါ၊ ဒီအီးစီးကရက်e-cigarettesကို သုံးစွဲတာတွေ့ရင် ငွေဒဏ်ထောင်ဒဏ်တွေချပြီး အရေးယူလေ့ရှိပါတယ်။