Rider nalunod sa baha

Isang 30-anyos na rider ang binawian ng buhay makaraang anurin ng malakas na alon ng tubig baha sa Barangay Catigan, Toril District, Davao City noong Linggo ng gabi.

Kinilala ng Toril-PNP, ang biktima na si Rodel Hornido, binata, laborer at residente sa Purok 5 Venus Street, Crossing Bayabas, Toril, Davao City.

Napag-alaman na bandang alas-7:45 ng gabi November 3, galing ng Toril Proper at sakay ng kaniyang motorsiklo ang biktima nang dumaan sa bahang kalsada sa Purok 8, Sitio Macareng Barangay Catigan.

Unang nakita ng mga residente ang motorsiklo ng biktima na nasa sa creek bandang alas-otso ng gabi.

Pero ang katawan ni Rodel ay bandang ala-una na ng madaling araw ng November 4 natagpuan ng mga miyembro ng Barangay Binugao Disaster Response Team sa may creek malapit sa McArthur Highway, Barangay Binugao Toril, Davao City harap ng Tri-Star Plastic Inc.

Nakalagak ngayon ang katawan ng biktima sa funeral parlor sa Toril, Davao City. (Edith Isidro)