Anak nga ‘nanigbas’ napatay sa iyang amahan

Tulo ka samad dinunggaban sa iyang dughan maoy mitapos sa kinabuhi sa 27 anyos nga anak lalaki human dunggaba sa iya ra sab nga amahan, alas 7:00 sa buntag, Biyernes, Nobiyembre 1, 2024, sa Barangay Sta. Cruz, Lungsod sa Ronda, Cebu. 

Ang namatay giila nga si Michael Ugbanel, ulitawo samtang ang suspek si Moses, 57, panday ug ipon ra og balay sa maong dapit. 

Sa nahipos nga kasayuran sa Superbalita Cebu sa pakighinabi sa silingan sa banay’ng Ugbanel nga nag-away ang magtiayon apan milaban si Michael sa iyang inahan sa dihang nagdako na ang ilang away. 

Report sa Ronda Police nga gitigbas ni Michael ang iyang amahan ug nakaangkon og minor injury.

Sa kalagot sa suspek misulod kini sa ilang balay aron pagkuha og kutsilyo nga matod pa mibalik sa gawas dayon gidunggab ang biktima tumong sa dughan. 

Patay nang nadangat sa ospital si Michael samtang nasikop si Moses mga polis. /DVG