တောင်းခမ်း စစ်ရေးအထူးတင်းမာ၊ ပြင်ဦးလွင်မြို့အဝင် စစ်ကောင်စီ တင်းကြပ် – သျှမ်းသံတော်ဆင့်

သျှမ်းပြည်မြောက်ပိုင်း နောင်ချိုမြို့နယ် တောင်းခမ်းဒေသတွင် စစ်ကောင်စီတပ်နှင့် TNLA ပူးပေါင်းတပ်များ စစ်ရေး အထူးတင်းမာနေပြီး စစ်ကောင်စီတပ်က ပြင်ဦးလွင်မြို့ အဝင်ကို တင်းကြပ်လိုက်သည်ဟု စစ်ရေးသတင်းရင်းမြစ်က ပြောသည်။

TNLA သိမ်းပိုက်ထားသည့် နောင်ချိုမြို့မှ ၁၅ မိုင် အကွာအဝေးတွင် ရှိသည့် စစ်ကောင်စီ အမြောက်တပ်များ တည်ရှိရာ တောင်းခမ်းဒေသတွင် တိုက်ပွဲများ ဖြစ်ပွားနေသည်မှာ နှစ်လကျော် ကြာမြင့်နေပြီဖြစ်ပြီး ယခု နောက်ဆုံး တိုက်ပွဲ ပြင်းထန်စွာ ဖြစ်ပွားနိုင်သဖြင့် ဒေသခံများ တိမ်းရှောင်သွားပြီဟု သတင်းရင်းမြစ်က ဆိုသည်။

“သီပေါက တပ်တွေ ကျပြီးတဲ့နောက် တောင်းခမ်းဘက် လှည့်မယ်ဆိုတာ စစ်ကောင်စီကလည်း သိတယ်။ သူတို့လည်း ပြင်ဦးလွင်ဘက်ကကော၊ ရပ်စောက်ဘက်ကကော ရသမျှ အင်အား ဖြည့်နေတာပဲ။ လေကြောင်းကနေလည်း ဗုံးကြဲတယ်၊ လက်နက် ရိက္ခာ ချပေးတယ်။ အခုက အဆုံးအဖြတ် တိုက်ပွဲ ဖြစ်တော့မယ့် သဘောရှိတယ်”ဟု စစ်ရေးသတင်းရင်းမြစ်က ရှင်းပြသည်။

ယခုရက်ပိုင်း အတွင်း TNLA ပူးပေါင်းတပ်များ တောင်းခမ်းဒေသသို့ အင်အား အလုံးအရင်း ဖြည့်တင်းနေကြောင်း၊ စစ်ကူ အလုံးအရင်း မပို့ပါက အခြေအနေ မကောင်းနိုင်ကြောင်း၊ လက်ရှိ ပြင်ဦးလွင်မြို့ အဝင်ကို တင်းကြပ်ထားသည်မှာ မှန်ကန်ကြောင်း စစ်ကောင်စီတပ်နှင့် နီးစပ်သည့် သတင်းရင်းမြစ်က ဆိုသည်။

“တောင်းခမ်းကျရင် ပြင်ဦးလွင်နဲ့ မန္တလေး အခြေအနေ မကောင်းဘူး။ သျှမ်းတောင် ရပ်စောက်အထိပါ စစ်မီးကူးနိုင်တယ်။ ရပ်စောက်မှာ SSPP လည်းရှိတယ်၊ ဓနုလည်းရှိတယ် ဆိုတော့။ ရက်ပိုင်း အတွင်း တိုက်ပွဲကြီး ဖြစ်မယ်လို့ သူတို့လည်း (စစ်ကောင်စီ) တွက်ထားတာပဲ”ဟု ၎င်းက ရှင်းပြသည်။

ယမန်နေ့က TNLA ပူးပေါင်းတပ်များ အင်အားဖြည့်တင်းနေသည့် သတင်းရရှိသဖြင့် အမြောက်တပ်များ အနီးရှိ နားရှိုး၊ မက်လွတ်၊ တောင်ရှည်နှင့် တောင်းခမ်းရွာများကို Y-12 လေယာဉ်ဖြင့် ဗုံးပတ်ကြဲသွားရာ ယင်းရွာများသာမက တိုက်ပွဲ ဧရိယာအတွင်း ကျရောက်နိုင်သည့် ယာပြင်၊ အင်းဖို၊ နောင်တော၊ သဲတိုက် စသည့် ရွာများနေ ဒေသခံများ ပြောင်းရွှေ့ရန် TNLA က ပြောဆိုထားကြောင်း ဒေသခံ သတင်းရင်းမြစ်က ဆိုသည်။

တောင်းခမ်းဒေသ စစ်ရေးတင်းမာနေစဉ် နောင်ချိုမြို့နယ် အင်းဝိုင်း- ဘန့်ဘွေးမှ ပြင်ဦးလွင်သို့ ဆက်သွယ်ထားသည့် ကားလမ်းကို ယမန်နေ့က TNLA ဘက်က ပြန်ဖွင့်ပေးခဲ့ကြောင်း သိရသည်။

“အင်းဝိုင်း-ဘန့်ဘွေးလမ်းက ပိတ်ထားတာကြာပြီ။ မနေ့က ပြန်ဖွင့်ပေးတယ်။ ထွက်ချင်တဲ့ ဒေသခံတွေထွက် ဝင်ချင်တဲ့လူတွေလည်း အထဲဝင်လာပေါ့။ အချိန် ၅ ရက် ဖွင့်ပေးမယ်လို့ကြားတယ်” ဟုဒေသခံ တစ်ဦးက ဆိုသည်။

ယနေ့ နံနက်ပိုင်းတွင်မူ စစ်ကောင်စီဘက်က ပြင်ဦးလွင်-မန္တလေး လမ်းမပေါ်ရှိ (၁၆) မိုင်ဂိတ်တွင် ပြင်ဦးလွင်သို့ ဝင်ရောက်မည့် အတက်ကားများကို တင်းတင်းကြပ်ကြပ် စစ်ဆေးနေကြောင်း၊ ပြင်ဦးလွင်မြို့တွင်း၌မူ လာရောက်လည်ပတ်သည့် ခရီးသွားများဖြင့် စည်ကားနေကြောင်း ၎င်းကဆက်ပြောသည်။

ပြီးခဲ့သည့် ရက်ပိုင်းအတွင်းက သီပေါမြို့ကို TNLA အလုံးစုံ သိမ်းပိုက်ပြီးနောက် တောင်းခမ်းဘက်သို့ တပ်များ ပြောင်းရွှေ့ရာက ယခုကဲ့သို့ စစ်ရေး တင်းမာလာခြင်း ဖြစ်ပြီး နောက်ဆုံး တိုက်ပွဲအဖြစ် သုံးသပ်မှုများ ထွက်ပေါ်လာခြင်း ဖြစ်သည်။

တောင်းခမ်းဒေသ စစ်ရေး အခြေအနေနှင့် ပတ်သက်၍ ထပ်မံ သိရှိနိုင်ရန် TNLA ပြောရေးဆိုခွင့်ရှိသူထံ မေးမြန်းထားဆဲ ဖြစ်သည်။

နောင်ချိုမြို့နယ်၊ တောင်းခမ်းဒေသတွင် စစ်ကောင်စီ အမှတ် (၉၀၂) အမြောက်စခန်းကွပ်ကဲမှုဌာနချုပ်နှင့် အမြောက်တပ်ရင်း (၃၅၄)၊ (၂၀၆)၊ (၄၀၆) တို့ တည်ရှိသည်။

ယင်းအနက် အမှတ် (၂၀၆) နှင့် (၄၀၆) တို့ကို ဩဂုတ်လ ၂၆ ရက်နေ့က သိမ်းပိုက်ခဲ့ပြီး ဖြစ်သည်ဟု TNLA က ထုတ်ပြန်ထားသော်လည်း စစ်ကောင်စီ ဝါဒဖြန့် ချန်နယ်များတွင်မူ ယင်းတပ် ၂ ခု ကျဆုံးခြင်းမရှိဟု ငြင်းဆိုထားဆဲ ဖြစ်သည်။

တောင်းခမ်းဒေသသည် သျှမ်းမြောက်နှင့် သျှမ်းတောင် အဆက်နေရာဖြစ်ပြီး စစ်ရေးအရ အချက်အခြာကျသည့် ဒေသဖြစ်သည်။