လားရှိုးမြို့ ယနေ့ညနေပိုင်း စစ်ကောင်စီ ဗုံးကြဲ၊ ဆိုင်ကယ်မောင်းနေသည့် အရပ်သား သေဆုံး – သျှမ်းသံတော်ဆင့်

သျှမ်းမြောက်၊ လားရှိုးမြို့ကို ယနေ့ (အောက်တိုဘာလ ၁၄ ရက်) ည ၆ နာရီခွဲ ဝန်းကျင်တွင် စစ်ကောင်စီ လေကြောင်းမှ ဗုံးကြဲခဲ့သဖြင့် အရပ်သား ထိခိုက် သေဆုံးမှုရှိကြောင်း ဒေသခံများက ပြောသည်။

ကိုးကန့်တပ်-MNDAA သိမ်းပိုက်ထားသည့် လားရှိုးမြို့ရှိ အရပ်ဘက် ပစ်မှတ်များကို စစ်ကောင်စီက နေ့စဥ် ဗုံးကြဲ တိုက်ခိုက်နေရာ ယနေ့ညနေ ဗုံးကြဲမှုကြောင့် အရပ်သား တစ်ဦး သေဆုံးပြီး တစ်ဦးဒဏ်ရာရရှိသည်ဟု ကနဦး သိရှိရကြောင်း ဒေသခံ တစ်ဦးက ဆိုသည်။

“နားမခေါ် ကားကြီးကွင်းနားက ရွှေတောင်ကြားဘက် ဗုံး ၃ လုံးကျတယ် ကြားတယ်။ ဆိုင်ကယ်စီးလာတာ ဗုံးထိလို့ တစ်ယောက်သေတယ်၊ တစ်ယောက် ဒဏ်ရာပြင်းတယ် ကြားတယ်။ လေယာဉ် ထပ်လာအုံးမလား မသိဘူး” ဟု ၎င်းကဆိုသည်။

လေကြောင်းမှ ဗုံး ၃ လုံးကြဲချရာ ပေါက်ကွဲမှု ပြင်းထန်သဖြင့် ပေါင် ၅၀၀ ဗုံးဟု ယူဆကြောင်း၊ ထိခိုက်ပျက်စီးမှုများ ရှိသော်လည်းအတိအကျ မသိရှိရသေးကြောင်း ၎င်းကဆက်ပြောသည်။

ယနေ့ နံနက် အစောပိုင်းက လားရှိုးမြို့နယ်၊ အီနိုင်းကျေးရွာကို စစ်ကောင်စီ ဗုံးကြဲ တိုက်ခိုက်ရာ ဒေသခံ ပြည်သူ ၃ ဦးသေဆုံးပြီး ၃ ဦး ဒဏ်ရာရခဲ့ကြောင်း MNDAA က ထုတ်ပြန်ထားသည်။

လားရှိုးအနောက်ဘက် အီနိုင်းရွာကို ဗုံး ၇ လုံး ကြဲချတိုက်ခိုက်ခဲ့ရာ နေအိမ် ၂၀ ကျော်၊ ဆေးခန်း၊ ဘုရား ရှိခိုးကျောင်းနှင့် အဆောက်အဉီးများ ထိခိုက်ပျက်ခဲ့ကြောင်း ထုတ်ပြန်ချက်တွင် ဖော်ပြသည်။

MNDAA သိမ်းပိုက်ထားသည့် လားရှိုးမြို့ကို စစ်ကောင်စီ နေ့စဉ် လေကြောင်းမှ ဗုံးကြဲတိုက်ခိုက်နေရာ အရပ်သား အများအပြား သေဆုံး၊ ထိခိုက်ဒဏ်ရာရနေပြီး မြို့မဈေး အပါအဝင် အဆောက်အဉီးများစွာ ပျက်စီးခဲ့သည်။