Written by 
ပေကျင်း၊နိုဝင်ဘာ ၂၇
တရုတ်နိုင်ငံသည် လက်ဘနွန်နှင့် အစ္စရေး အခြေအနေကို အနီးကပ်စောင့်ကြည့်နေပြီး သက်ဆိုင်ရာအဖွဲ့အစည်းများမှရရှိထားသည့် အပစ်အခတ်ရပ်စဲရေးသဘောတူညီချက်ကို ကြိုဆိုကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူကပြောကြားခဲ့သည်။
အစ္စရေးဝန်ကြီးချုပ် ဘန်ဂျမင်နေတန်ယာဟုက လက်ဘနွန်၌ အပစ်အခတ်ရပ်စဲရေးကို အစ္စရေးလုံခြုံရေးအဖွဲ့က အတည်ပြုလိုက်ပြီဟု အင်္ဂါနေ့ကကြေငြာခဲ့သကဲ့သို့ လက်ဘနွန်အစိုးရကလည်း ယခုဆုံးဖြတ်ချက်ကို ထောက်ခံကြိုဆိုခဲ့သည်။
ယခုကိစ္စနှင့်ပတ်သက်ပြီး တရုတ်နိုင်ငံ၏သဘောထားကိုမေးမြန်းရာ၌ တရုတ်နိုင်ငံသည် လက်ဘနွန်နှင့် အစ္စရေးတို့၏ အခြေအနေကို အနီးကပ်စောင့်ကြည့်နေပြီး ကုလသမဂ္ဂလုံခြုံရေးကောင်စီ၏ ဆုံးဖြတ်ချက်အမှတ် ၁၇၀၁ ကို လိုက်နာရန် သက်ဆိုင်ရာ အဖွဲ့အားလုံးကို တစိုက်မတ်မတ်တောင်းဆိုခဲ့သည်ဟုပြန်လည်ပြောကြားခဲ့သည်။
တစ်ချိန်တည်းမှာပင် ဂါဇာကမ်းမြောင်ဒေသ၌ အပစ်အခတ်ရပ်စဲရေး ကို မဖော်ဆောင်နိုင်ခြင်းကလည်း အရှေ့အလယ်ပိုင်းတွင် ဆက်လက်ဖြစ်ပွားနေသည့် မတည်ငြိမ်မှုများ၏ မူလဇစ်မြစ်ဖြစ်သည်ဟု တရုတ်နိုင်ငံကယုံကြည်ကြောင်းပြောကြားခဲ့သည်။
ဆက်လက်၍လည်း ဂါဇာကမ်းမြောင်ဒေသတွင် အပစ်အခတ်ရပ်စဲရေးကို အမြန်ဆုံးဖော်ဆောင်နိုင်ရန်နှင့် ရေရှည်ရပ်စဲရေးမျိုးဖြစ်ရန်အတွက် အင်အားစုအားလုံးက အတူတကွပူးပေါင်းဆောင်ရွက်သင့်သည်ဟုလည်း ပြောရေးဆိုခွင့်ရှိသူမော်နင်ကပြောကြားခဲ့သည်။
Source : ရှင်းဟွာ