Amahan gipusposan og dustpan sa anak nga ‘adik’

Nagpaalim sa iyang samad sa agtang ug kamot nga nanghubag ang 71 anyos nga amahan human bunalbunali og dustpan sa iyang 42 anyos nga anak nga gikatahong nagumon sa ginadiling drugas. 

Ang insedente nahitabo niadtong alas 5:30 sa hapon, Lunes, Nobiyembre 25, 2024 sa Sityo Peace Valley, Barangay Bulacao, Cebu City. 

Ang biktima giila nga si Pricillano Basera, biyudo, samtang ang suspek iya ra sab nga anak nga si Yul Brian, ulitawo.

Si Police Staff Sgt. Jaymos Tordios, imbestigador sa Inayawan Police Station mibutyag sa Superbalita Cebu nga ang biktima nangita sa iyang portable grinder ug giingong napungot ang suspek kay siya maoy gipangitaan. 

Nagisi ang agtang sa biktima human naigo sa dustpan ug nahuboy ang mga kamot sa pagsinagang sa mga bunal sa iyang anak. 

Usa sab sa gikalagutan sa suspek kay wala na siya maatiman sa iyang papa ilabi na sa pagpakaon tungod kay matod pa aduna kini’y babaye nga gikabuangan human nga nabiyudo.

Ang maong suspek gibuhian ra sab sa dihang miduso og affidavit ang biktima nga dili na mopasaka og reklamo. 

“Naluoy daw siya human nakakita sa iyang anak nga na-priso. Gusto  unta sa amahan nga ipa-rehab pero wala silay kwarta,” matod pa ni Tordios.

Ang suspek dili mangayo og pasaylo sa iyang nahimo ngadto sa iyang amahan kay siya nagtuo nga gi-frame up niini aron nga mabilanggo. / GPL