အာရှတွင် အကျပ်အတည်းများဖြစ်လာစေရန် အမေရိက,က ထိုင်ဝမ်ကို အသုံးချနေ–ရုရှား

အမေရိကန်ပြည်ထောင်စုသည် ထိုင်ဝမ်ကို အသုံးချ၍ အာရှတွင် ဆိုးဝါးသောအကျပ်အတည်း ပေါ်ပေါက်လာစေရန် လုပ်ဆောင်နေကြောင်း ရုရှား ဒုတိယနိုင်ငံခြားရေးဝန်ကြီး Andrei Rudenko က ပြောဆိုသည်ဟု တာ့စ် သတင်းဌာနက တနင်္ဂနွေနေ့တွင် သတင်းဖော်ပြခဲ့ပြီး ထိုင်ဝမ်နှင့် ပတ်သက်သော တရုတ်နိုင်ငံ၏ ရပ်တည်ချက်ကို မော်စကိုက ထောက်ခံကြောင်း ထပ်လောင်းပြောကြားခဲ့သည်။

ဝါရှင်တန်သည် ၎င်းတို့ထောက်ခံထားသည့် တရုတ်တစ်နိုင်ငံတည်းမူကို ချိုးဖောက်၍ လက်ရှိအနေအထားကို ထိန်းသိမ်းထားသည်ဆိုသော ကြွေးကြော်မှုအောက်တွင် ထိုင်ဝမ်နှင့် စစ်ရေး၊ နိုင်ငံရေးဆက်ဆံမှု အားကောင်းလာသကဲ့သို့ လက်နက်ရောင်းချပေးမှုများလည်း တိုးမြှင့်လာသည်ကို မြင်တွေ့နေရသည်ဟု Rudenko က နိုင်ငံပိုင်သတင်းဌာနကို ပြောဆိုခဲ့သည်။

ဒေသတွင်းအရေးအရာများတွင် အမေရိက၏ ယင်းကဲ့သို့ သိသာထင်ရှားသော ဝင်ရောက်စွက်ဖက်မှုများ၏ ရည်ရွယ်ချက်သည် တရုတ်ပြည်သူ့သမ္မတနိုင်ငံကို ရန်စရန်နှင့် ၎င်းတို့ကိုယ်ကျိုးစီးပွားကိုက်ညီစေရန် အာရှတွင် အကျပ်အတည်းဖန်တီးရေးဖြစ်သည်ဟု ၎င်းက ဆိုခဲ့သည်။

Rudenko က မည်သည့်လုပ်ဆောင်ချက်မျိုးကို ရည်ညွှန်းပြောဆိုခဲ့သနည်းကိုမူ သတင်းတွင် တိကျစွာဖော်ပြခဲ့ခြင်း မရှိပေ။

ဒီမိုကရေစီနည်းကျ အုပ်ချုပ်သည့် ထိုင်ဝမ်ကို တရုတ်က ၎င်း၏ ပိုင်နက်အဖြစ် ရှုမြင်ပြီး ယင်းအချက်ကို ထိုင်ဝမ်အစိုးရက ပယ်ချသည်။ အမေရိကသည် ထိုင်ဝမ်၏ အရေးကြီးဆုံး နိုင်ငံတကာ ကျောထောက်နောက်ခံပြုသူနှင့် လက်နက်ရောင်းချပေးသူဖြစ်သော်လည်း တရားဝင် သံတမန်ဆက်ဆံမှုမျိုးမလုပ်ခဲ့ပေ။

Rudenko ပြောဆိုချက်နှင့် ပတ်သက်၍ မှတ်ချက်ပေးရန် တောင်းဆိုခဲ့မှုကို အမေရိကန်နိုင်ငံခြားရေးဝန်ကြီးဌာနက လတ်တလောတွင် တုန့်ပြန်ခဲ့ခြင်း မရှိပေ။

Ref: ယူအက်စ်နူးစ်

Source link